22 - ⴰⵙⴰⴼⴰⵔ asafar
ⵉⵎⵟⵟⴰⵡⵏ ⵓⵔ ⴰⵔ ⵙⵉⵊⵊⵉⵏ ⵜⴰⵙⴰ ⵏⵏⴽ
ⴰ ⵢⴰⵏ ⵉⴽⴽⴰⵜⵏ ⵔⵉⵎⵉⴹⵉ ⵉⵖⴰⵔⴰⵙⵏ
ⵉⵏⵏⴰ ⵖ ⵉⵥⵕⴰ ⴰⵊⴷⴷⵉⴳ ⴰⵔ ⵜ ⵉⵜⵜⴰⵍⵖ
ⵉ ⵡⴰⵏⵏⴰ ⴷ ⴷⴰ ⵉⵎⵎⴰⴳⴰⵔ ⵢⵉⵔⵉ ⵜ
ⴰⴷ ⴰⵙ ⵉⴽⴽⵙ ⴰⵏⴽⴽⵉⴷ ⵉⵙⵙⵜⵓ ⴰⵙ ⵜ
***
ⵓⵍ ⵉⵏⵓ ⵔⵉⵖ ⴰⴷ ⴷ ⵉ ⵜⵙⴰⵡⵍⵜ
ⴰⴷ ⴽ ⵙⴰⵇⵙⴰⵖ, ⵎⵍ ⵉ ⵎⴰⴷ ⴽⵯⵏ ⵢⴰⵖⵏ
ⵜⴰⴳⵓⴹⵉ ⵜⴳⴰ ⴷ ⵉⴳⵓⴷⵉⵢⵏ ⴼⵍⵍⴰⴽ
ⴰⵎⴰⵔⴳ ⵏ ⵡⵉⵏⵓ ⴰⴷ ⴽ ⵉⴳⴰⵏ ⵖ ⵉⴼⴰⵙⵙⵏ
ⴰⵔ ⵉⵢⵉ ⵜⵎⵔⵔⴰⵜⵏ ⴳⴳⵓⵎⵖ ⴰⴷ ⵜ ⴰⴼⵖ
***
ⵡⴰⵍⵍⵉ ⵔⵉⵖ ⵔⴰ ⴰⴽ ⵙⵙⵓⴷⵓⵎⵖ ⵉⴼⴰⵙⵙⵏ
ⵍⴽⵎ ⵉⵢⵉ ⴷ, ⵍⵍⵉⵎ ⵉⵢⵉ ⴷ ⵓⵔ ⵜⴰ ⵎⵎⵓⵜⵖ
ⴽⵢⵢⵉ ⴽⴰ ⵉⴳⴰⵏ ⴰⵙⵙⵏⵊⵎ ⵏ ⵡⵓⵍ ⵉⵏⵡ
***
ⵉⵏⵏⴰ ⵖ ⵏⵥⵕⴰ ⴰⵊⴷⴷⵉⴳ ⴰⵔ ⵜ ⵏⵜⵜⴰⵍⵖ
ⵏⵖⴰⵍ ⵉⵙ ⴷ ⵏⵜⵜⴰ ⴽⴰ ⴰⴷ ⴰⵏⵖ ⵉⴽⴽⵉⵙⵏ
ⴰⴷ ⵉⵍⵉⵖ ⴷ ⵓⴳⴰⵢⵢⵓ, ⴹⵓⴼⵖ ⵓⵍ ⵉⵏⵡ
ⵉⵖ ⵉⴱⵓⵖⵍⴰ ⵓⵊⵊⵉⴳ, ⵉⵙⵎⴰⵇⵇⵍ ⵜⵏ
ⵡⴰⵏⵏⴰ ⴷ ⵉⵣⵔⵉⵏ, ⵉⵙⵉⴳⵍ ⵜ, ⵢⵉⵔⵉ ⵜ
ⴰⴷ ⵜ ⴽⴰ ⵉⵥⵕ ⵜⴰⴳⵓⴹⵉ ⵜⵔⴰ ⴰⴷ ⵜⴰⵏⴼ
ⵏⵖⴷⴷ ⵉⵖ ⵢⵓⴼⴰ ⴰⴷ ⵜ ⵉⴷ ⵉⴽⴽⵙ, ⴰⵡⵉⵏ ⵜ
ⴰⵙⵙ ⵏⵏⴰ ⵜ ⵔⴰⵏ ⴰⴷ ⵜ ⵉⴹⵓⴼ ⵜⴰⵎⴰ ⵏⵏⵙ
***
Taieb Amgroud, sg udlis "agad n tidt", ⵉⵎⵉ ⵏ ⵜⵍⵉⵜ ⵖ 2945